Það er afskaplega gleðilegt að geta sagt frá því að þjónusta Garðabæjar er heilt yfir álitin mjög góð. Íbúar gefa okkur góðan vitnisburð í nýrri könnun Gallup fyrir árið 2023 og fyrir það erum við öll þakklát. Garðabær er á langflestum sviðum meðal efstu sveitarfélaga og við erum það sveitarfélag þar sem heildaránægja með þjónustuna mælist hæst. Í þessari könnun breytist staðan þó frá síðasta ári, en ánægja mælist minni á nokkrum sviðum þótt við höldum okkar góðu stöðu. Við sjáum að þær áskoranir sem við höfum staðið frammi fyrir undanfarið hafa áhrif á það hvernig íbúar upplifa þjónustuna. Það eru mikilvæg skilaboð.

Markmið könnunarinnar er að kanna ánægju með þjónustu 20 stærstu sveitarfélaga landsins og gera samanburð á þeim ásamt því að skoða breytingar frá fyrri mælingum. Af niðurstöðum sést vel að þau sem hafa nýtt sér þjónustu bæjarins segjast vera ánægðari heldur en þau sem ekki hafa nýtt hana. Það er ánægjulegt, enda skiptir upplifun notenda öllu máli.

Við erum vaxandi samfélag sem hefur ýmsa góða kosti en gerir þjónustukröfuna sterkari. Við höfum verið að glíma við rakaskemmdir í skólahúsnæði og okkur gengur vel á þeirri vegferð. Við höfum einnig unnið að umbótum á leikskólaþjónustunni og munum sjá árangur af þeirri vinnu á næstu mánuðum. Eftir íþróttaleiki er oft sagt: „Við eigum nóg inni.“ Ég held að við séum einmitt þar, nú skoðum við vel hvernig Garðabær getur haldið áfram að bæta þjónustuna enn frekar.

Við búum að metnaðarfullu skólastarfi á öllum stigum og tilhlökkun okkar er mikil gagnvart því að opna nýja leikskólann okkar Urriðaból á næstu vikum og að taka í notkun annan áfanga Urriðaholtsskóla. Við vitum líka að tilkoma búsetukjarna fyrir fatlað fólk í Brekkuási og Vinagarðs í Urriðaholti voru mikilvæg og kærkomin skref.

Eitt af því sem mér finnst dýrmætt er náið samstarf og samtal milli Garðabæjar og íbúanna hér í bænum. Ég tel að boðleiðirnar séu með stysta móti og að við getum brugðist við hratt og örugglega. Von mín er sú að íbúar Garðabæjar upplifi það einnig.

Ég legg mikið upp úr þessu samtali og á næstu vikum ætla ég að færa skrifborðið mitt úr ráðhúsinu í hverfi bæjarins. Mig langar að hvetja ykkur til að kíkja á mig,  ræða það sem er gott og það sem má gera betur. Það hjálpar okkur að stilla fókusinn og bæta þjónustuna enn frekar.

Almar Guðmundsson, bæjarstjóri Garðabæjar og oddviti Sjálfstæðisflokksins.

Greinin birtist fyrst í Garðapóstinum, 15.febrúar 2024.

Í tilefni af Degi leikskólanna, sem haldinn er hátíðlegur 6. febrúar, vil ég ræða um spennandi breytingar sem eru á næsta leiti og þakka leikskólastarfsfólki fyrir þeirra ómetanlega framlag til samfélagsins.

Nú standa yfir mikilvægar breytingar í rekstri og stjórnun leikskólanna í Garðabæ. Þær voru samþykktar í bæjarstjórn þann 16.11.2023 og eru þær liður í því að styrkja innviði leikskólanna og bæta starfsumhverfið. Breytingarnar eru afrakstur ítarlegrar vinnu og samráðs við hagsmunaaðila. Markmið þeirra er að hafa  jákvæð áhrif á daglegt líf og starfsemi leikskólanna.

Eitt af markmiðum þessarar vegferðar er að laða að og halda í hæfileikaríkt starfsfólk. Við vitum að gæði leikskólans endurspeglast í gæðum kennaranna og annars starfsfólks. Því er mikilvægt að skapa umhverfi þar sem starfsfólkið finnur fyrir virðingu, stuðningi og möguleikum til faglegs vaxtar.

Á þessum tímamótum vil ég einnig færa starfsfólki leikskólanna sérstakar þakkir. Ykkar óeigingjarna vinna, árangur og helgun við menntun og umönnun yngstu kynslóðarinnar er ekki aðeins mikilvæg fyrir þau sjálf og fjölskyldur þeirra, heldur einnig fyrir samfélagið allt. Ykkar starf er grundvöllur að öflugu og heilbrigðu samfélagi.

Dagur leikskólanna er ekki aðeins tækifæri til að fagna þessari mikilvægu starfsemi, heldur einnig til að endurskoða og endurnýja okkar skuldbindingu við framtíðina. Með þessum nýju  breytingum stígum við skref í rétta átt, en við megum ekki gleyma að framtíð leikskólanna er í höndum hvers og eins okkar.

Ég hvet alla íbúa Garðabæjar til að taka þátt í þessum mikilvæga degi, heimsækja leikskólana, kynnast starfinu og styðja við þá frábæru vinnu sem þar fer fram. Saman getum við tryggt að leikskólar í Garðabæ verði áfram staðir vaxtar, þroska og gleði fyrir komandi kynslóðir.

Margrét Bjarnadóttir, bæjarfulltrúi og formaður leikskólanefndar.

Greinin birtist fyrst í Garðapóstinum, 8.febrúar 2024.

Bæjarstjórn Garðabæjar samþykkti fyrir áramót tillögur íþrótta- og tómstundaráðs um tekjutengingu hvatapeninga fyrir börn og ungmenni í bænum. Öll börn á aldrinum 5-18 ára, með lögheimili í Garðabæ, þ.e. börn fædd á árunum 2006-2019, geta fengið greiðslu hvatapeninga árið 2024 til niðurgreiðslu á æfinga- og námskeiðagjöldum í skipulögðu íþrótta- og tómstundastarfi.

Fjárhæð hvatapeninga og skilyrði tekjutengingar

Fjárhæð hvatapeninga árið 2024 verður óbreytt, þ.e. 55.000 kr., en nýjar reglur kveða á um að fjölskyldur sem eru undir skilgreindum viðmiðunartekjum öðlist rétt á 15.000 kr. viðbótargreiðslu hvatapeninga eða 70.000 kr. heildargreiðslu á hvert barn í þeirra forsjá.

Hægt er að sækja um viðbótarhvatapeninga í þjónustugátt Garðabæjar ef heildartekjur heimilis eru að meðaltali lægri en 800.000 kr. á mánuði hjá einstaklingi eða 980.000 kr. hjá sambýlisfólki m.v. launavísitölu 1. janúar 2024. Miðað er við staðgreiðsluskrá fyrir síðustu þrjá mánuði þegar umsókn er send inn. Nánari upplýsingar má finna á vef Garðabæjar, www.gardabaer.is.

Hvað er hægt að nýta hvatapeninga í?

Hægt er að nýta hvatapeninga til að lækka kostnað við skipulagt íþrótta- og tómstundastarf sem nær yfir 10 vikur að lágmarki. Undantekning eru 5 og 6 ára börn þar sem lágmarkstímalengd námskeiða eru 20 kennslustundir óháð vikufjölda. Hægt er að ráðstafa hvatapeningum bæði til félaga innan Garðabæjar sem og í öðrum sveitarfélögum.

Ungmenni í þremur elstu árgöngunum, þ.e. þau sem eru fædd 2006, 2007 og 2008, geta fengið hvatapeninga greidda vegna kaupa á korti í líkamsræktarstöð. Þá er hægt að nýta hvatapeninga til að greiða niður tónlistarnám, bæði í Tónlistarskóla Garðabæjar sem og í öðrum tónlistarskólum.

Ef félag sem barn eða ungmenni iðkar íþróttir eða tómstundir hjá er tengt Sportabler eða XPS skráningarkerfinu er hægt að nýta hvatapeninga beint í gegnum kerfin. Nánari upplýsingar um hvernig sótt er um hvatapeninga má finna á vef Garðabæjar.

Garðabær fyrsta sveitarfélagið til að innleiða hvatapeninga

Árið 2005 var Garðabær fyrsta sveitarfélagið til að innleiða svokallaða hvatapeninga en um var að ræða beinan fjárhagslegan styrk til niðurgreiðslu á æfingagjöldum. Styrkurinn var kallaður „hvatapeningar“ enda megin tilgangurinn að hvetja ungmenni til þátttöku í skipulögðu íþróttastarfi. Um ákveðna upphæð var að ræða sem veitt var árlega. Fljótlega var styrkveitingin útvíkkuð og hún látin ná til hvers konar tómstundaiðkunar sem greiða þurfti fyrir. Seinna meir bættist tónlistarnám við. Með innleiðingu hvatapeninga var stuðlað að valfrelsi og jafnrétti á sviði íþrótta- og æskulýðsmála í Garðabæ. Þannig var greiðsla hvatapeninga ekki bundin við tiltekið félag og ekki heldur við íþróttastarfsemi í Garðabæ. Svo er enn í dag.

Hvatapeningakerfið hefur reynst vel

Þetta framtak Garðabæjar vakti töluverða athygli sem varð til þess að fleiri sveitarfélög tóku upp svipað kerfi um styrkveitingar frístundastyrks, eins og hann er víða kallaður. Þetta kerfi hefur reynst vel. Bæði hefur það hvatt og aukið þátttöku ungmenna í hollu og skipulögðu íþrótta- og tómstundastarfi, en um leið hefur það styrkt íþrótta- og tómstundafélög og rennt styrkari stoðum undir starfsemi þeirra. Þannig hafa félögin getað innheimt æfingagjöld sem leiðir til þess að þau geta ráðið vel menntaða og hæfa þjálfara og leiðbeinendur. Hvatapeningakerfi Garðabæjar hefur verið við lýði í 19 ár og hefur góð reynsla fengist með því. Það er mikilvægur liður í umhverfi íþrótta- og æskulýðsmála í bænum en þróun þess er sífellt til umræðu.

Garðabær fyrsta sveitarfélagið til að tekjutengja hvatapeninga

Enn stígum við ný skref í Garðabæ. Íþrótta- og tómstundaráð vann að og undirbjó tillögu að þeirri nýbreytni að tekjutengja hvatapeninga með það að augnamiði að skapa umhverfi í hvatapeningakerfinu sem veiti jöfn tækifæri fyrir hvert barn í bænum óháð félags- eða fjárhagslegri stöðu foreldra.

Markmið hvatapeninga er að hvetja börn og ungmenni til þátttöku í skipulögðu íþrótta- og tómstundastarfi, en rannsóknir hafa sýnt fram á að forvarnargildi hvatapeninga er ótvírætt. Niðurstöður rannsókna sýna að þátttaka í skipulögðu íþrótta- og tómstundastarfi undir leiðsögn faglegra leiðbeinenda hefur jákvæð áhrif á líðan barna og ungmenna og dregur úr áhættuhegðun eins og áfengisneyslu, reykingum og neyslu óæskilegra efna.

Leggjum grunn að heilbrigðu lífi barna og ungmenna – veitum jöfn tækifæri

Það er því mikils um vert að hvatapeningakerfi Garðabæjar sé þannig úr garði gert að það hvetji sem flest börn og ungmenni til þátttöku í skipulögðu íþrótta- og tómstundastarfi. Markmiðið er að stuðla að jöfnum tækifærum barna og ungmenna í bænum. Það leggur grunn að heilbrigðu lífi barna og ungmenna sem leiðir að góðu og heilbrigðu samfélagi í Garðabæ.

Með þetta að markmiði samþykkti bæjarstjórn Garðabæjar tillögu íþrótta- og tómstundaráðs um tekjutengingu hvatapeninga árið 2024.

Hrannar Bragi Eyjólfsson, bæjarfulltrúi og formaður íþrótta- og tómstundaráðs.

Greinin birtist fyrst í Garðapóstinum, 1.febrúar 2024.