Áslaug Hulda Jónsdóttir skrifar:

Valið er ein af meginstoðum í stefnu Sjálfstæðisflokksins. Frelsið til að velja. Það er hlutverk okkar sem erum í stjórnmálum að veita einstaklingum tækifæri til þess að velja, velja það sem þeim hentar best. Við eigum að geta valið hvar við búum, hvernig við ferðumst á milli staða, hvar við göngum í skóla eða leitum eftir læknisþjónustu rétt eins og við veljum hverju við klæðumst og hvar við verslum.
Valið færir valdið til fólksins og í því felst hið raunverulega lýðræði. Þegar við bjóðum upp á ólíka valkosti, með valinu, færist valdið til einstaklinganna. Það hlýtur því að vera verkefni stjórnmálanna að auka val fólksins.

Ég hef stundum velt þessu fyrir mér í umræðunni um lýðræði. Það er mikilvægt að við aukum íbúalýðræði en það er til lítils að halda ógrynni samráðsfunda og íbúaþinga, eða opna vefsvæði, ef fólk getur svo ekki valið um fjölbreytta valkosti, hvort sem er í dagvistun, skólum, tómstundum, heilbrigðismálum eða annarri þjónustu.

Samkeppni eykur gæði
Samkeppni í hvaða mynd sem hún er hreyfir við kerfinu. Þegar ekki eru einstaklingar eða verkefni í áskrift, heldur valkostir og möguleikar á að leita annað, þá aukum við metnaðinn og um leið gæðin. Það má ekki vanmeta mikilvægi ólíkra valkosta og frelsið til að velja. Við megum aldrei gleyma því fyrir hverja þjónustan er, að kerfið er til fyrir fólkið en fólkið ekki fyrir kerfið.

Í Garðabæ höfum við lagt áherslu einmitt á þetta. Fjölbreytni og ólíka valkosti og þar vegur valið í skólamálum þyngst. Þetta skiptir máli. Í Garðabæ höfum við líka lagt áherslu á lága skatta. Og þrátt fyrir allt tal um að lægri sköttum fylgi minni þjónusta er þjónustan góð í Garðabæ. Það góð að íbúar í Garðabæ eru ánægðastir allra með þjónustu í leik- og grunnskólum sveitarfélagsins. Í mínum huga er ekki minnsti vafi á því að þetta grunnstef í stefnu Sjálfstæðisflokksins hefur sjaldan átt eins vel við og einmitt nú. Við eigum að lækka skatta, efla atvinnulífið og auka valkostir fyrir fjölskyldur í landinu.

Áslaug Hulda Jónsdóttir, formaður bæjarráðs Garðabæjar og skipar 1.sæti á lista Sjálfstæðisflokksins í Garðabæ.

Áslaug Hulda Jónsdóttir skrifar:

Það vantar húsnæði á höfuðborgarsvæðinu en uppbygging hefur verið mikil í Garðabæ. Á kjörtímabilinu hefur íbúðum í Garðabæ fjölgað um 10,9% á sama tíma og meðaltalið á höfuðborgarsvæðinu var 4,3%. Við þurfum að halda áfram.

Öríbúðir og hverfi fyrir ungt fólk

Við viljum og höfum unnið að því að ungt fólk hafi kost á aðbúa í Garðabæ. Í Lyngási rís nýtt hverfi sem er fyrir ungt fjölskyldufólk. Á kjörtímabilinu var haldin hugmyndasamkeppni um skipulag slíks hverfis þar sem sérstaklega var horft til þarfa ungs fólks. Í Urriðaholti hefur verið mikil uppbygging og þar er m.a. verið að byggja öríbúðir í samvinnu við IKEA sem fjölgar valkostum á húsnæði í Garðabæ. Á Álftanesi er skipulagsvinna í gangi en þar er unnið með miðbæjarsvæði sem er í nálægð við skóla, íþrótta- og tómstundamannvirki.

Á síðasta ári keypti Garðabær land Vífilsstaða af ríkinu og fékk þá um leið umráðarétt og skipulagsvald. Þetta var mikilvægur áfangi. Skipulagsvinna er þegar komin af stað og þar verður fjölbreytt og spennandi hverfi með ólíkumhúsnæðiskostum. Þar verður byggt upp nýtt skólahverfi ásamt fjölnota íþróttahúsi sem rís í Vetrarmýri. Það hefur því margt áunnist á kjörtímabilinu og mörg spennandi verkefni í farvegi.

Höldum áfram

Uppbygging og aukið framboð hefur áhrif og eykur möguleika ungs fólks á því að fá húsnæði. En við þurfum að ganga lengra. Við æltum að skoða nýjar og fjölbreyttar leiðir í búsetuúrræðum fyrir ungt fólk. Tryggja þarf að yngra fólk hafi forgang að hluta lóða á þeim svæðum sem uppbygging er að hefjast. Skoða þarf möguleika á samvinnu við félög sem tryggja ungu fólki húsnæði og valkostum á leigu þarf að fjölga. Þetta getum við því Garðabær á land til uppbyggingar, uppbygging er hafin og skipulag í farvegi. Næstu skref er að forgangsraða þannig að búseta í Garðabæ verði raunverulegur valkostur fyrir ungt fólk.

Áslaug Hulda Jónsdóttir, formaður bæjarráðs og skipar 1. sæti á lista Sjálfstæðisflokksins

Guðfinnur Sigurvinsson og Jóna Sæmundsdóttir skrifa:

Garðabær hefur á kjörtímabilinu unnið að endurheimt votlendis við Bessastaðatjörn, Kasthústjörn og Urriðakotsvatn og við erum stolt af því að minnka þannig losun gróðurhúslofttegunda og auka samtímis fuglalíf og fjölbreytt lífríki í okkar einstöku náttúru. Sjálfstæðisflokkurinn í Garðabæ vill halda áfram að endurheimta votlendi í bæjarlandinu.

Urriðaholt til eftirbreytni á heimsvísu

Urriðaholt er fyrsta hverfið á Íslandi þar sem blágrænar regnvatnslausnir voru innleiddar. Það er einnig fyrsta hverfið á þessari breiddargráðu sem býður upp á slíkar lausnir en hverfið þykir eftirbreytnivert alþjóðlegt dæmi um farsæla innleiðingu þeirra. Garðabær hefur gert samstarfssamning við Háskóla Íslands, Landbúnaðarháskóla Íslands og Háskólann í Lundi um rannsóknarverkefni þar sem markmiðið er að koma á fót rannsóknarvettvangi og byggja upp rannsóknarmiðstöð á sviði blágrænna regnvatnslausna í Urriðaholti í Garðabæ. Verkefnið styður við innleiðingu blágrænna regnvatnslausna í íslensku bæjarumhverfi.

Unnið hefur verið að því að gera útivistarstíg við Urriðavatn og lýkur þeirri framkvæmd í sumar. Gerð útivistarstígs og aukið aðgengi yfir votlendið er mikill styrkur fyrir svæðið og gerir íbúum í nærliggjandi byggð kleift að ganga hringinn í kringum Urriðavatn og umhverfi þess á öruggan hátt. Framkvæmdin hefur aukið útivistargildi svæðisins til muna en einnig verður gerð aðgengileg tenging úr Urriðaholti í friðland Heiðmerkur.

Flokkun plasts og grenndargámar

Þann 1. mars sl. hófst flokkun á plasti við öll heimili í Garðabæ. Það er von okkar að þessa aukna þjónusta gagnist íbúum vel. Sjálfstæðisflokkurinn í Garðabæ vill vinna áfram að minnkun sorps og stuðla að meiri flokkun og við ætlum að vinna af festu gegn hvers kyns plastsóun í Garðabæ.

Friðun, útivist og göngustígar

Í Garðabæ er 40% af bæjarlandinu friðað. Strandlengja Álftanes er einstök og mikilvægt að friða hana og gera aðgengilega til útivistar. Nýir göngu- og hjólastígar hafa verið lagðir á undanförnum árum, svo sem meðfram Hafnarfjarðarvegi og fyrir neðan Vífilsstaði sem tengir byggðina við friðlandið.  Við viljum halda áfram að efla möguleika til útivistar í Garðabæ og í friðlandinu. Rannsóknir hafa sýnt að gott aðgengi að náttúru hefur mikil áhrif á lýðheilsu fólks bæði andlega og líkamlega.

Vistvænar samgöngur

Settar hafa verið upp rafhleðslustöðvar í miðbæ Garðabæjar. Á næstu mánuðum verða settar upp fleiri stöðvar svo sem við Íþróttahúsið á Álftanesi og við Ásgarð. Bætt verður við strætóskýlum og hjóla- og göngustígum og þeir gerðir öruggari.

Höfundar eru frambjóðendur Sjálfstæðisflokksins í Garðabæ.

Garðabær hóf í mars flokkun á plasti og geta bæjarbúar nú sett það sér í poka og beint í tunnuna með almenna sorpinu en til undirbúnings fengu íbúar í Garðabæ í lok febrúar sendan bækling með upplýsingum um plastflokkunina. Sjálfstæðisflokkurinn í Garðabæ ætlar að vinna af festu gegn hvers kyns plastsóun í bæjarfélaginu, bæði í öllum rekstri á vegum bæjarfélagsins og með fræðslu og samvinnu við bæjarbúa og fyrirtæki í bænum. Við viljum að flokkun sorps verði áfram efld á næsta kjörtímabili og grenndargámar gerðir aðgengilegri og þeim fjölgað.

Plastmengun hafsins er ein alvarlegasta umhverfisváin sem við stöndum frammi fyrir á þessari öld og brýnt að grípa til aðgerða. Sú spá er nú á allra vitorði að árið 2050 verði meira af plasti en fiskum í hafinu. Síðan þessu var slegið fram hefur bresk rannsókn verið kynnt opinberlega sem segir að plastmengun hafsins muni þrefaldast næsta áratuginn ef ekkert verður að gert. Engar skyndilausnir munu koma fram yfir nótt sem losa okkur úr klípunni.

Íslendingar nota u.þ.b. 70 milljónir einnota plastpoka á ári en að meðaltali er hver plastpoki notaður í 25 mínútur. Það getur svo tekið á bilinu 100 til 500 ár fyrir plastið að brotna niður í náttúrunni. Allt það plast sem hefur verið framleitt frá upphafi eða í heila öld er því í reynd enn til í einni eða annarri mynd, s.s. í landfyllingum eða í hafinu. Og fyrir Íslendinga sem byggja afkomu sína á sjávarútvegi er það alvarlegt umhugsunarefni að um 8% allra plastpoka endar í hafinu en það jafngildir um 5 milljónum plastpoka á Íslandi árlega.

Þegar plast brotnar niður í agnir sem eru innan við 5 mm að stærð skilgreinum við það sem örplast. Plast er feitt efni og virkar eins og segulstál á eiturefni í umhverfinu en örplastið á greiða leið í lífverur sjávar, s.s. í gegnum tálkn fiska, og geta eiturefni borist þannig upp fæðukeðjuna. Við vitum að efnið plast er hormónatruflandi og hefur áhrif á vöxt og frumur. Við vitum líka að lífverur í hafinu borða plast í stað fæðu og rýrna fyrir vikið eða deyja. Einnig geta þær flækst í því. Þær upplýsingar sem við höfum um framleiðslu plasts segja okkur að efnið er ekki vistvænt, það er að meginuppistöðu unnið úr olíu og öðrum mengandi efnum og þar af leiðandi á plast ekki heima í náttúrunni, hvort sem er til lands eða sjós.

Hvað getum við gert?
Við getum öll lagt okkar risasmáa til í baráttunni en uppsprettur plastmengunar eru margs konar. Um sumar getur almenningur engu breytt en aðrar geta neytendur hæglega kveðið í kútinn. Velta má t.d. fyrir sér hversu margar agnir af örplasti verði til við niðurbrot á einum plastpoka? Eða sogröri? Sennilega skipta þær milljónum á milljónir ofan agnirnar af örplasti sem hver og einn getur komið í veg fyrir að hafni í hafinu með því að draga verulega úr eða hætta notkun á einnota burðarpokum úr plasti, sogrörum, drykkjarmálum og einnota hnífapörum úr plasti, svo eitthvað sé nefnt. Ekkert af þessu er nauðsynlegt, það eru til fjölnota lausnir og þetta er allt spurning um að breyttar neysluvenjur. Dæmi eru um íslenskar verslanir sem bjóða ekki upp á burðarplastpoka og enginn kvartar yfir því, þrátt fyrir að fólk geri þar magninnkaup.

Eina leiðin til að draga úr plastsóun og koma í veg fyrir plastmengun fæst með hnattrænu átaki á öllum stjórnsýslustigum, meðal almennings, fyrirtækja og félagasamtaka. Sveitarfélög ásamt ríki eiga að vera hryggjarstykkið í þessari þróun. Garðabær á að vera í hópi þeirra íslensku sveitarfélaga sem best vinna gegn plastsóun, það er okkar vilji og metnaður. Okkar vegferð er hafin og við óskum eftir stuðningi og góðum samstarfsvilja frá bæjarbúum, félagasamtökum og fyrirtækjum í bænum. Vinnum þetta saman. Árið 2050 verður innan líftíma fjölmargra sem þetta lesa, við erum ekki aðeins að búa í haginn fyrir komandi kynslóðir – við verðum að vernda hafið fyrir okkur sjálf.

Guðfinnur Sigurvinsson skipar 9. sæti á framboðslista Sjálfstæðisflokksins í Garðabæ fyrir komandi sveitarstjórnarkosningar og skrifaði „Plastmengun í hafi – Hvað er til ráða?“ meistararitgerð í opinberri stjórnsýslu við Háskóla Íslands.

Á 40 ára afmælisári Álftanesskóla hefjast framkvæmdir vegna 1900 fermetra viðbyggingar við skólann. Með þessari viðbyggingu gjörbreytist aðstaða til náms og tómstundaiðkunar við skólann auk þess sem tengibygging milli skóla og íþróttahúss gerir allt starf þægilegra fyrir nemendur og starfsmenn.

Fyrsta skóflustunga að Álftanesskóla var tekin á vordögum 1975 og lauk framkvæmdum við fyrsta áfanga skólans að mestu um haustið 1978 þegar skólinn tók til starfa.

Barnaskólahald hófst á Álftanesi árið 1880 þegar Grímur Thomsen, bóndi á Bessastöðum, lánaði húsnæði undir barnakennslu þar á staðnum. Skólahald var á Bessastöðum til árins 1889 en þá var reist lítið skólahús í landi Bjarnastaða, Bjarnastaðaskóli og kennsla fluttist þangað.

Árið 1914 var svo byggt nýtt skólahús á Bjarnastöðum, nýr Bjarnastaðaskóli, þar sem barnakennsla í Bessastaðahreppi var hýst til vors 1978 en þá um haustið hófst kennsla í nýjum Álftanesskóla.

Álftanesskóli verður til

Fyrir 50 árum síðan, vorið 1968, hófust umræður í hreppsnefnd Bessastaðahrepps um byggingu nýs skólahúss í sveitarfélaginu en þar bjuggu þá um 230 manns. Á sama tíma var lagning vatnsveitu orðin brýn og varð úr að vatnsveituframkvæmdin skyldi hafa forgang. Var gengið til samninga við Garðahrepp um kaup á vatni úr svonefndri Garðahverfisæð og var samningur þar að lútandi samþykktur í hreppsnefnd Bessastaðahrepps í janúar 1971.

Eftir lagningu vatnsveitunnar hófust umræður aftur um nýjan skóla. Upphaflega var gengið út frá því að nýja skólahúsið yrði reist við eldri skólann á Bjarnastöðum. En þar sem áform voru um stækkun byggðar og horfur um fjölgun íbúa sveitarfélagsins á næstu árum þar á eftir þótti rétt að íhuga nýtt skólasvæði semyrði meira miðsvæðis í stækkaðri byggð. Varð úr að skólanum var valinn staður í landi Eyvindarstaða þar sem skólasvæðið hefur byggst upp síðan.

Framkvæmdir hófust á vordögum 1975 eins og áður sagði og fluttist skólahald frá Bjarnastöðum í nýjan Álftanesskóla um haustið 1978. Reyndar var ekki einhugur um nafnið á nýja skólanum og vildu ýmsir að haldið yrði áfram með hið 90 ára gamla nafn Bjarnastaðaskóla.  

Mikil stækkun í farvatninu

Nú stendur yfir útboð vegna byggingar 2ja hæða viðbyggingarmeð kjallara við Álftanesskóla, tengibyggingar milli núverandi skóla og íþróttahússins. Viðbyggingin er alls um 1900m2 að flatarmáli.

Leyfi fyrir viðbyggingunni hefur þegar verið samþykkt af byggingarfulltrúanum í Garðabæ og bæjarráð hefur staðfest þá leyfisveitingu. Áætlað er að hefja framkvæmdir 28. maí nk. og að verkinu verði lokið í nóvember 2019.

UMFÁ fær vallarhúsið til afnota

Tómstundastarf yngstu nemenda Álftanesskóla hefur um nokkurra ára skeið verið starfrækt í vallarhúsinu við gervigrasvöllinn. Staðið hefur til að flytja starfsemina nær skólanum.

Bæjarráð hefur nú samþykkt að samhliða undirbúningi að viðbyggingu við Álftanesskóla verði farið í framkvæmdir við aðtengja saman fjórar lausar kennslustofur á skólalóðinni sem munu þá nýtast fyrir starfsemi tómstundaheimilis. Eftir samtengingu lausu kennslustofanna og flutning á tómstundastarfsemi yngstu nemendanna þangað mun UMFÁ fá vallarhúsið til afnota enda þarfnast félagið aðstöðunnar mjög, bæði fyrir grasvöllinn og nýja gervisgrasvöllinn á íþróttasvæðinu við Breiðumýri.

Á næsta kjörtímabili er stefnt að því að bæta íþróttaaðstöðuna enn frekar, m.a. með lýsingu og bættri aðstöðu fyrir áhorfendur.

Gunnar Valur Gíslason, bæjarfulltrúi og formaður menningar- og safnanefndar

Björg Fenger, varabæjarfulltrúi og formaður íþrótta- og tómstundaráðs

Sigríður Hulda Jónsdóttir, bæjarfulltrúi og formaður skólanefndar grunnskóla

Garðabær í forystu í fjármálum

Ég er einn af þeim sem hefur mikinn áhuga á fjármálum og rekstri. Sumir vinir mínir brosa að mér fyrir það og segja að það geti nú ekki verið mikið fjör eða gleði í því að liggja yfir talnaverkinu. Ég get allavega huggað mig við að fjármál skipta miklu máli. Traust, sjálfbær og ábyrg staða í fjármálum er eftirsóknarverð alls staðar og gildir þá einu um hvort um er að ræða ríki, sveitarfélög, fyrirtæki eða heimili.

Sterk fjárhagsleg staða

Garðabær hefur allnokkra sérstöðu hvað varðar sterka fjárhagslega stöðu sveitarfélaga en á sama tíma er þjónustan öflug. Þetta skiptir máli. Afkoma bæjarsjóðs á síðasta ári var jákvæð um 1,1 milljarð króna og staðan er sterk á alla mælikvarða. Skuldahlutfall er 85% og hefur farið lækkandi á undanförnum árum. Það er til marks um góða stöðu að á sama tíma og skuldir vaxa ekki er unnt að fjárfesta fyrir tæpa 3 milljarða króna sem er met.

Ársskýrsla eftirlitsnefndar með fjármálum sveitarfélaga sem gefin var út í desember 2017 gefur góða mynd af stöðu Garðabæjar í samanburði við önnur sveitarfélög í landinu sem eru á meðal þeirra 10 stærstu (tölur um rekstur 2016). Þar má sjá að rekstrarniðurstaða Garðabæjar sem hlutfall af tekjum var 12% en meðaltal hinna sveitarfélaganna var 6%. Veltufé frá rekstri sem hlutfall af tekjum var 21% í Garðabæ en 16% að meðaltali í samanburðarsveitarfélögum. Þá var skuldahlutfall samanburðarsveitarfélaganna (150%) að jafnaði nærri tvöfalt hærra en í Garðabæ (79%). Með öðrum orðum,Garðabær er í forystu meðal stærri sveitarfélaga landsinsþegar kemur að fjármálum.

Lágar álögur

Það er mikilvægt að átta sig á hverju þessi staða skilar. Álögur á bæjarbúa eru með því lægsta sem gerist meðal sveitarfélaga. Þjónusta er góð og framkvæmdir meiri en víðast hvar. Tekjur bæjarins skila sér beint í þjónustu, enda eru vaxtagjöld ekki fjárfrekur útgjaldaliður. Að auki hefur verið hægt að fjármagna framkvæmdir í miklum mæli úr rekstri bæjarfélagsins án lántöku. Þetta er eftirsóknarverð staða og langt því frá sjálfgefin á Íslandi í dag.

Um áratugaskeið hefur Garðabær verið í forystu hvað þessi mál varðar. Ábyrg fjármálastjórn er einn af hornsteinum stefnu núverandi meirihluta í bæjarstjórn og við viljum sækja umboð bæjarbúa til að halda áfram á þeirri braut. Farsæl fjármálastjórn er góður grunnur að öflugri þjónustu, ánægju íbúa og kraftmikilli uppbyggingu. Það skiptir máli að Garðabær sé í forystu í fjármálum.

Almar Guðmundsson, bæjarfulltrúi, hagfræðingur. Skipar 6. sæti á lista Sjálfstæðisflokksins

20 milljónir til vellíðunarverkefna í grunnskólum bæjarins

Vellíðan nemenda hefur allt frá upphafi verið einn af aðal áhersluþáttum við úthlutun Þróunarsjóðs grunnskóla í Garðabæ. Vellíðan og trú á eigin getu hefur bein áhrif á árangur. Sá sem finnur fyrir vanlíðan er ekki að lifa styrkleika sína og nær því ekki þeim árangri sem hann annars gæti. Það er því samfélagsleg ábyrgð sveitarfélaga að huga vel að líðan nemenda í skólastarfinu.

Ótal tækifæri felast í tilverunni hjá unga fólkinu okkar, en einnig áskoranir sem að hluta til má rekja til stöðugra áreita, samanburðar og hraða í samfélaginu. Tengsl eru á milli skjátíma, svefntíma og líðan ungmenna. Því meiri sem skjátíminn er, því líklegra er að svefninn sé minni og því líklegra að viðkomandi finni fyrir vanlíðan. Þetta er ástæða þess að um 20% af fjármagni Þróunarsjóðs grunnskóla í Garðabæ, eða um 20 milljónum, hefur verið úthlutað til verkefna sem tengjast beint líðan nemenda, félagsfærni og samskiptahæfni síðastliðin fjögur ár.

100 milljónir til þróunarverkefna 

Þróunarsjóður grunnskóla hefur úthlutað 100 milljónum til fjölþættra verkefna síðastliðin fjögur ár. Yfirlit yfir þessi verkefni má sjá á heimasíðu Garðabæjar. Fleiri verkefni styrkt af þróunarsjóði snúa einnig að vellíðan nemenda svo sem verkefni sem leggja áherslu á jákvæðan skólabrag, lífsleikni, heilbrigðan lífsstíl, siðfræði, samfélagsábyrgð, jafnrétti, náms- og starfsráðgjöf og starfsfræðslu. Sérstök áhersla hefur verið lögð á samspil svefns, snjalltækja og líðan t.d. í forvarnaviku skólanna.

Samvinnuverkefni allra grunnskóla sem og sérverkefni tengd vellíðan nemenda

Þau verkefni sem þróunarsjóður hefur styrkt og snúa að líðan nemenda eru annars vegar umfangsmikil verkefni sem allir skólar í Garðabæ sameinast um að taka þátt í svo sem Velferð barna sem er liður í því að fylgja heildrænni nálgun er varðar jafnrétti, kynheilbrigði og velferð barna og ungmenna í Garðabæ. Annað dæmi um samvinnuverkefni skólanna er vinaliðaverkefni sem felur m.a. í sér að í frímínútum er boðið upp á skipulagða leiki sem allir eiga aðgengi að á nokkrum stöðum á skólalóðinni.

Hins vegar er um að ræða ýmis smærri verkefni innan skóla sem beinast að vellíðan og sjálfsmynd nemenda svo sem verkefnið ,,Ég er frábær eins og ég er“ og verkefnin ,,Að þjálfa jákvætt hugarfar“ og ,,Vinátta og vellíðan“ svo dæmi séu tekin. Styrkir hafa einnig verið veittir til að jóga, slökun og hugleiðsla verði ríkari þáttur í skólastarfinu. Flataskóli varð einn af þremur fyrstu skólum á Íslandi til þess að verða réttindaskóli Unicef, en í slíkum réttindaskólum er áhersla á að hafa börnin með í öllum ákvörðunum sem snerta hag þeirra og réttindi.

Val um skóla styður við vellíðan

Vellíðan í skóla er grundvöllur námsárangurs. Sjálfsmynd barna skapast að hluta til í gegnum upplifun í skóla, þá náms- og félagslegu stöðu sem barnið upplifir sig í meðal jafnaldra. Í Garðabæ hafa nemendur og foreldrar þeirra val um skóla óháð búsetu sem skapar þann möguleika að börn geta valið skólaumhverfi og –brag sem hentar þeim sem best. Skólarnir eru hvattir til að efla sérstöðu sína og tveir sjálfstætt starfandi skólar í bænum standa börnum í Garðabæ til boða án skólagjalda. Hvert barn hefur sína styrkleika sem þarf að byggja á og sínar þarfir sem skólaumhverfið þarf að koma til móts við, því er val um skóla mikilvægur þáttur í því að tryggja vellíðan grunnskólabarna.

Ánægður kennari, ánægðir nemendur

Ánægja kennara í starfi hefur áhrif á líðan nemenda og árangur samkvæmt rannsóknum. Garðabær hefur lagt áherslur á að efla starfsumhverfi kennara og annarra starfsmanna skólanna til dæmis í gegnum þróunarsjóð leik- og grunnskól og með stuðningi til frekara náms. Sjóðurinn hefur á þessu kjörtímabili úthlutað styrkjum til margskonar þróunarverkefna sem gefur metnaðarfullum starfmönnum tækfæri til að þróa störf sín áfram og slík verkefni skila sér til nemenda í fjölbreyttum áherslum. Skólarnir þurfa að hafa rými til að hlúa að vellíðan starfsmanna og nemenda með ýmsu móti, það skapar grunn að öflugu skólastarfi.

Á komandi kjörtímabili munum við leggja áherslu á að efla enn frekar og útvíkka þróunarsjóði skólanna í Garðabæ og vera í forystu að efla vellíðan nemenda og starfsmanna skólanna.

Sigríður Hulda Jónsdóttir er bæjarfulltrúi Sjálfstæðisflokksins í Garðabæ, formaður skólanefndar grunnskóla og skipar 2. sæti framboðslistans fyrir komandi sveitarstjórnarkosningar.