Um 2600 nemendur í Garðabæ eru um það bil að hefja skólagöngu eða byrja aftur í skólanum þessa vikuna. Þeirra bíður stór starfsmannahópur tilbúinn til að takast við verkefni vetrarins þar sem áhersla verður meðal annars á nemendalýðræði. Til dæmis mun hluti nemenda fá að stýra foreldraviðtölunum ásamt kennurunum sínum, fara yfir styrkleika sína og setja sér þannig sjálf markmið fyrir skólastarfið í vetur.

Fimm ára deild í Sjálandsskóla

Við Sjálandsskóla hóf fimm ára deild göngu sína í liðinni viku. Foreldrum barna í Garðabæ stendur til boða að innrita fimm ára börn í Sjálandsskóla, en Garðabær hefur um áraraðir rekið slíka deild við Flataskóla með góðum árangri. Þar sem leikskóladeildin er í sama húsnæði og Sjálandsskóli veitir það góð tækifæri til að brúa bilið á milli skólastiga en starfsemin samtvinnast markvisst við grunnskólann. Börnin munu vinna í gegnum leik og læra meðal annars jóga, hugarfrelsi, bóklestur, samvinnu og markmiðasetningu að ógleymdum vinastundum.

Símenntun starfsfólks

Starfsfólki skólanna verður einnig boðin ýmis sí- og endurmenntun í vetur og eru fyrirhuguð fjölmörg áhugaverð námskeið skipulögð af fræðsluskrifstofunni og skólastjórnendum. Til dæmis má nefna að allir nýir kennarar í grunnskólum bæjarins fá byrjendanámskeið í KVAN verkfærakistunni sem hefur reynst skólastarfinu í bænum afar vel. Verkfærakistan er hagnýtt námskeið fyrir kennara og annað fagfólk. Þar er unnið að því að efla samskiptafærni nemenda, auðvelda starfsmönum að koma auga á börn í félagslegum vanda og beita árangursríkum aðferðir til að vinna með þeim. Þá hefur hinseginfræðsla Samtakanna 78 mælst afar vel fyrir í skólunum okkar. Í ár munu nemendur í þriðja, sjötta og níunda bekk njóta fræðslu frá þeim.

Endurbætur á skólum

Skólastarf Garðabæjar raskaðist talsvert á síðasta skólaári vegna aðkallandi framkvæmda í Álftanesskóla, Flataskóla, Garðaskóla og Hofsstaðaskóla. Starfsfólk, nemendur og foreldrar eiga mikla þakkir skildar fyrir þolinmæði og þrautseigju sína á síðasta skólaári. Staðan er góð eftir stormasaman vetur. Búið er að lyfta grettistaki í öllum grunnskólunum enda  hafa framkvæmdir gengið vel í sumar.

Í öllum skólunum er búið að hreinsa út rakaskemmt efni og unnið hörðum höndum að því að klára kennslustofur. Það er ljóst að framkvæmdir verða í hluta af húsnæði skólanna fyrstu vikurnar en  lögð verður áhersla á að takmarka ryk og rask. Framkvæmdum verður lokið fyrir upphaf skólaársins í Álftanesskóla. Framkvæmdir hafa gengið vel í Garðaskóla og er stefnt að því að allar kennslustofur verði klárar þegar skólastarf hefst. Talsverð nemendaaukning verður í Garðaskóla og því er nú unnið að því að bæta færanlegum kennslustofum við skólann sem verða tilbúnar í lok næsta mánaðar. Í Hofsstaðaskóla mun framkvæmdum verða lokið í september. Í Flataskóla verða kennslustofur klárar við skólabyrjun, að undanskildum heimilisfræðistofu og smíðastofu. Framkvæmdir verða áfram á sal skólans, en vonir standa til að þeim verði lokið fljótlega eftir að skólastarf hefst og hann verður að hluta til tilbúinn.  Framkvæmdir eru á góðri siglingu við 2. áfanga Urriðaholtsskóla eftir frostamikinn vetur. Í septemberlok er von á fjórum kennslustofum og hreyfirými við skólann. Í nýjum áfanga eru heimasvæði og list- og verkgreinastofur.

Skólabarnið í forgang!

Setjum skólabarnið okkar í fyrsta sæti  – sér í lagi næstu vikurnar. Sköpum gleði og festu í kringum skólabyrjun og tryggjum þannig að það sé skemmtilegt að byrja í skólanum að loknu sumarfríi.

Sigríður Hulda Jónsdóttir, formaður skólanefndar grunnskóla Garðabæjar og forseti bæjarstjórnar

Greinin birtist fyrst í Garðapóstinum, 24.ágúst 2023.

Bærinn okkar hefur verið þekktur sem öflugur skóla- og íþróttabær, segja má að glæst frammistaða á þessum sviðum séu okkar aðalsmerki en þriðja stoðin gæti orðið menning og listir. Til þess eigum við öll sóknarfæri. Nauðsynlegt er að bæta aðstöðu og húsnæðismál til að svo geti orðið en allt annað er til staðar.

Menningarveturinn í Garðabæ var einstaklega öflugur og mörg nýmæli í boði. Dagskrá fyrir fjölskyldur, fyrir eldri borgara og þá sem geta brugðið sér á tónleika í hádeginu, fyrir jazzgeggjara og aðra tónlistaráhugamenn, fyrir fróðleiksfúsa um ýmiskonar málefni eru rúmlega fimmtíu talsins á vorönn einni. Þá er ótalið allir þeir viðburðir sem í boði voru fyrir skólahópa en á vorönn nutu 2299 grunnskólabörn dagskrár í boði menningar- og safnanefndar.

Fyrsta flokks lista- og fræðifólk hefur lagt hönd á plóg þegar kemur að öllum viðburðum hvort sem er fyrir börn eða fullorðna en yfirumsjón með allri dagskrá hefur menningarfulltrúi bæjarins Ólöf Breiðfjörð sem er í góðu samstarfi við starfsfólk stofnana bæjarins hvort sem er skólastjórar og kennarar eða starfsfólk menningarstofnana.

Menning fyrir alla fjölskylduna

Viðburðir fyrir fjölskyldur á Bókasafni Garðabæjar fóru fram á laugardögum svo sem sögur og söngur sem ætlað er yngstu börnunum með foreldrum sínum, föndurstundir og forritun, hljóðfærasmiðja og öskupokagerð svo eitthvað sé nefnt. Á Hönnunarsafni Íslands fóru fram leirsmiðjur, furðudýrasmiðja og skuggasmiðja þar sem teiknað var eftir skuggum skúlptúra Einars Þorsteins stærðfræðings og hönnuðar.
Hádegistónleikaröðin Tónlistarnæring hefur fest sig í sessi en tónleikar fara fram fyrsta miðvikudag í mánuði í sal Tónlistarskóla Garðabæjar. Á tónleikunum koma fram fyrsta flokkst tónlistarmenn í bland við upprennandi stjörnur og ávallt þétt setið í yndælum salnum í tónlistarskólanum. Aðrir viðburðir fyrir fullorðna eru leiðsagnir í Hönnunarsafninu og fyrirlestrar um hönnun en einnig ýmiskonar áhugaverð erindi á Bókasafni Garðabæjar svo sem erindi frá Samtökunum 78, erindi um skyndihjálp ungbarna og rithöfundaspjall.

Skólamenning

Í upphafi hverrar annar er menningardagskrá fyrir skólahópa kynnt skólastjórum og kennurum og óhætt að segja að samstarfið milli menningarfulltrúa og skólasamfélagsins sé eins og best verður á kosið. Í vor fóru fram í Hönnunarsafninu hönnunarsmiðjur fyrir 4. bekkinga og allir nemendur 4. bekkja í grunnskólum Garðabæjar tóku þátt í að hanna og búa til heimili í fjölbýlishús sem varð að sýningu á safninu sem var opnuð á Barnamenningarhátíð. Fimmtu bekkingar tóku hinsvegar þátt í verkefnavinnu  um landnámið á margmiðlunarsýningunni Aftur til Hofsstaða á Garðatorgi 7 en Barnamenningarsjóður styrkti verkefnagerðina sem unnin var af þjóðfræðingi með það fyrir augum að gera áhugaverð og skemmtileg verkefni fyrir nemendur. Valgerður Guðnadóttir söngkona flutti ásamt píanóleikara og fiðluleikara Töfrafljóð sem allir 1. og 2. bekkingar Garðabæjar nutu en farið var í tónlistarferðalag með Valgerði og félögum og ýmiskonar tónlist kynnt á skemmtilegan hátt fyrir nemendum. Á Barnamenningarhátíð dönsuðu svo 1. bekkingar í danspartýi á Garðatorgi. Þriðju bekkingar tóku þátt í furðudýrasmiðju á Hönnunarsafninu auk þess sem sýning á skringilegum fjölbýlishúsum eftir 4. bekkinga var opnuð. Gunnar Helgason tók á móti 5. bekkingum í ritsmiðju á Bókasafninu og 7. bekkingar fóru í leiðsögn og spjall með fornleifafræðingi um Minjagarðinn á Hofsstöðum og Aftur til Hofsstaða. Þá var opnuð á Bókasafni Garðabæjar sýning á verkum leikskólabarna, Músagangur á bókasafninu. Í maí nutu svo 4. bekkingar óperunnar Töfraflautan eftir Mozart en það voru nemendur söngdeildar Tónlistarskólans sem fluttu. Þá tóku nemendur unglingastigs þátt í Ljóðaslammi á Bókasafninu og nemendur 6. bekkjar þátt í ratleik um safnið.

Jazzþorpið og Rökkvan

Jazzþorpið í Garðbæ fór líklega ekki framhjá neinum en ánægja með hátíðina var mikil. Menningar- og safnanefnd fékk til liðs við sig Ómar Guðjónsson sem á veg og vanda að hugmyndavinnu þorpsins og fékk til liðs við sig fyrsta flokks jazztónlistarmenn sem fluttu tónlist en einnig erindi tengd jazzinum. Garðatorg var skreytt lituðum pappírskúlum og húsgögn frá Góða Hirðinum voru til sölu. Þúsundir sóttu Garðatorg heim þessa helgi og var það um leið mikil lyftistöng fyrir verslun og þjónustu á svæðinu.

Í haust mega Garðbæingar eiga von á öflugri menningardagskrá fyrir alla aldurshópa en stóri viðburður haustsins verður Rökkvan, listahátíð unga fólksins í Garðabæ sem haldin var í fyrsta sinn í fyrra við frábærar undirtektir. Við eigum mikinn auð í ungu listafólki sem er reiðubúið að leggja mikið á sig til að efla menningarlíf bæjarins og okkur ber skylda til að styðja þau dyggilega.

Auk þess að standa fyrir öflugri dagskrá veitir menningar- og safnanefnd árlega styrki til einstaklinga, hópa og frjálsra félagasamtaka svo sem Grósku, félags myndlistarmanna í Garðabæ sem vinnur gott starf og annarra sem standa að tónleikum og sýningum í því skyni að efla menningarlíf Garðabæjar.

Guðfinnur Sigurvinsson, formaður Menningar- og safnanefndar og bæjarfulltrúi.

Greinin birtist fyrst í Garðapóstinum, 30.júní 2023.

Við í Garðabæ höfum lagt mikla áherslu á að börn fái boð um dvöl á leikskóla 12 mánaða þegar úthlutað er leikskólaplássum að vori. Í reglum um úthlutun um leikskóla er lögð áhersla á að systkini fari á sama skóla ef því er viðkomið. Í úthlutun þetta vorið hefur það gengið vel og stór hluti systkina hefur fengið að fylgjast að inn í sama leikskóla. Slíkt auðveldar foreldrum að koma börnum sínum í skóla og svo ekki sé talað um færri kolefnisspor í akstri.

Niðurfelling á leikskólagjöldum milli jóla- og nýárs og í páskaviku

Leikskólanefnd lagði til breytingu á gjaldskrá leikskóla fyrir tímabil milli jóla- og nýárs og í páskaviku. Tillagan felst í því að leikskólagjöld eru felld niður óski foreldrar eftir því að börn þeirra verði í fríi á þessum tíma. Mörg sveitafélög í kringum okkur hafa einnig innleitt þessa breytingu og virðist vera ánægja meðal foreldra um þennan valmöguleika. Með þessari breytingu láta foreldrar vita með fyrirvara hvort börn þeirra taki frí á þessum tímabilum. Þannig getur leikskólinn gert ráðstafanir varðandi orlof starfsfólks, skipulag innra starfs og síðast en ekki síst matarinnkaup sem leiðir til minni matarsóunnar.
Bæjarstjórn samþykkti tillöguna samhljóða þann 16. mars á bæjarstjórnarfundi. Ég er sannfærð um að þetta sé breyting til hins betra.

Hlakka til komandi tíma í leikskólanefndinni

Margrét Bjarnadóttir, formaður leikskólanefndar og bæjarfulltrúi.

Greinin birtist fyrst í Garðapóstinum, 4.maí 2023.

Í ár verður innleitt nýtt flokkunarkerfi á höfuðborgarsvæðinu og Suðurnesjum þar sem fjórum úrgangsflokkum verður safnað við hvert heimili. Þetta verður stórt framfaraskref í umhverfis- og loftslagsmálum en meðal annars munu öll heimili fá tunnu fyrir matarleifar. Með lögum um hringrásarhagkerfi, sem tóku í gildi um áramótin, er skylt að flokka heimilisúrgang í fjóra flokka við heimili: pappír, plastumbúðir, lífrænan úrgang (matarleifar) og blandaðan úrgang.

Íbúar munu finna lítið fyrir breytingunum og þurfa ekki að aðhafast neitt annað en að tileinka sér nýja flokkunarsiði. Tunnum verður skipt út þegar innleiðing hefst og íbúar þurfa ekki að grípa til neinna aðgerða hvað það varðar.

Meginmarkmiðið er að fjölga tunnum hjá íbúum eins lítið og hægt er og í flestum tilfellum verður leitast við að koma tunnum fyrir í því rými sem er þegar til staðar við íbúðarhús. Tunnum fyrir þessa fjóra flokka verður komið fyrir við íbúðarhús eftir þörfum en í einhverjum tilvikum verður núverandi tunnum skipt út fyrir tvær tvískiptar tunnur. Þetta kæmi til framkvæmda í haust eða að lokinni innleiðingu. Í hinu nýja kerfi verða því að jafnaði tvær til þrjár tunnur við sérbýli en í fjölbýlishúsum fer útfærsla eftir aðstæðum á hverjum stað. Mismunandi útfærslur verða á fjölda tunna en hægt er að sjá mögulegar útfærslur á meðfylgjandi mynd og á vefnum www.flokkum.is.

Nú þegar flokka flest heimili plast og pappír. Stærsta breytingin felst því í að öll heimili munu fá tunnu fyrir matarleifar en framkvæmd þess verður kynnt betur síðar.Til að auðvelda flokkun á matarleifum fá öll heimili á höfuðborgarsvæðinu gefins sérstaka körfu undir matarleifar og pappírspoka sem fara í hana. Með því að flokka matarleifar frá blönduðum heimilisúrgangi er hægt að endurvinna þær í metangas og moltu. Hið samræmda flokkunarkerfi sveitarfélaganna mun því draga stórlega úr urðun og síðar brennslu á úrgangi og styðja við innleiðingu hringrásarhagkerfisins.

Samhliða þessum breytingum verður grenndargámum gefið nýtt hlutverk við að taka á móti málmi, gleri, textíl og skilagjaldsskyldum umbúðum, sem samkvæmt lögum ber að flokka sérstaklega og safna í nágrenni við íbúa.
Í dag eru sorphirðugjöld innheimt með fasteignagjöldum en í skoðun er fyrirkomulag sem í tímanum breytist í „borgað þegar hent er“ þannig að sorphirðugjöld yrðu innheimt eftir rúmmáli íláta og gerð úrgangs við heimili. Rekstur grenndar-, söfnunar- og móttökustöðva yrði áfram fast gjald.
Tunnur fyrir nýja flokka byrja að berast heimilum í sumar. Útfærslur verða kynntar vel þegar nær dregur, en nánari upplýsingar og útfærslur má einnig finna á vefnum www.flokkum.is.

Stella Stefánsdóttir, formaður umhverfisnefndar og varabæjarfulltrúi.

Greinin birtist fyrst í Garðapóstinum, 5. apríl 2023.